प्रत्यक्षादीनामप्रामाण्यं त्रैकाल्यासिद्धेः ।
पूर्वं हि प्रमाणसिद्धौ नेन्द्रियार्थसन्निकर्षात् प्रत्यक्षोत्पत्तिः ।
पश्चात् सिद्धौ न प्रमाणेभ्यः प्रमेयसिद्धिः ।
युगपत्सिद्धौ प्रत्यर्थनियतत्वात् क्रमवृत्तित्वाभावो बुद्धीनाम् ।
त्रैकाल्यासिद्धेः प्रतिषेधानुपपत्तिः ।
सर्वप्रमाणप्रतिषेधाच्च प्रतिषेधानुपपत्तिः ।
तत्प्रामाण्ये वा न सर्वप्रमाणविप्रतिषेधः ।
त्रैकाल्याप्रतिषेधश्च शब्दादातोद्यसिद्धिवत्तत्सिद्धेः ।
प्रमेया च तुला प्रामाण्यवत् ।
प्रमाणतः सिद्धेः प्रमाणानां प्रमाणान्तरसिद्धिप्रसङ्गः ।
तद्विनिवृत्तेर्वा प्रमाणान्तरसिद्धिवत् प्रमेयसिद्धिः ।
न प्रदीपप्रकाशवत् तत्सिद्धेः।
क्वचिन्निवृत्तिदर्शनादनिवृत्तिदर्शनाच्च क्वचिदनेकान्तः।